Ulsteinanalysen - Ulstein Næringsforum

Offentlege taldata gir ikkje rett bilete av næringslivet lokalt. Grunnen er at tala baserer seg på innrapporterte næringsoppgåver til Brønnøysundsregisteret og merkast då under den kommunen som verksemda sitt hovudkontor er registrert.

Til dømes vil tal frå ei underavdeling av ei sentraleigd kjede ikkje dukke opp på statistikken over Ulstein, men kanskje Ålesund, Oslo eller Bergen. Dette gjeld både tal på verksemder, tilsette, dekningsbidrag, gjeld og omsetning m.m.

UNF lagar sine eigne tal

Ved hjelp av offentleg talmateriale, lokale verksemder sine eigne tal og andre næringsaktørar sine estimat, freistar vi å til ei kvar tid ha det rettaste biletet på korleis næringslivet i Ulstein er. Kontakt oss gjerne med ditt konkrete behov for statistikk.

Profesjonell analyse

På oppdrag frå UNF har Møreforsking laga ein prosjektskisse til ei profesjonell analyse. Ei slik analyse vil kunne vil koste i overkant av 300 000,-, noko vi så langt ikkje har klart å finne finansiering til. Inntil vi har dette på plass, nyttar vi offentleg tilgjengelege data, samt eigen informasjon innhenta blant medlemene.

Som medlem av Ulstein Næringsforum er vi ein del av eit fagleg fellesskap som gir rom for utvikling og samarbeid.

Magne Grimstad, Osberget AS

10,3 mrd i omsetning

Det «ulsteinske næringsliv» omset for ca 10,3 mrd kroner (2018). Dette gjer Ulstein til ein av dei største næringslivsregionane på Nordvestlandet.

Ved å hente inn tal frå verksemdene sjølve, bankar, organisasjonar og offentlege databasar har vi rekna oss fram til at næringslivet i Ulstein omset for ca 10.300.000.000 kr (2018). Dette plasserer Ulstein i toppsjiktet i landet rekna per innbyggjar og som eit tydeleg kraftsentrum på Nordvestlandet.

Mykje av omsetninga kjem frå industrien, som igjen er vesentleg etablert i maritim bransje og er ein viktig premissleverandør til den maritime klynga. Våre maritime bedrifter er også avhengig av dei andre klyngebedriftene i regionen, og det er viktig at denne klynga held fram med å møte utfordringar i bransjen saman.

79% privat sysselsetting

Ulstein kommune har høgast grad av privat sysselsetting i Møre og Romsdal, og er på 6. plass i landet. Vi kan også snu på det å seie at vi har blitt tilgodesett med 6. lågaste andel av offentlege arbeidsplassar. Dei vi har, er stort sett lokalt betinga (politi, ambulanse, kommune m.m.)

Mange kommunar har rundt 50% offentleg sysselsetting, og slit likevel med fråflytting, kompetansemangel og næringsavvikling. Ulstein har vist seg sterke og sjølvstendige, men i ein komplekst samansett bu- og arbeidsmarknadsregion saman med dei andre kommunane på Sunnmøre, og vi utnyttar kvarandre godt.

Ulstein har stor netto innpendling frå nabokommunane.