✨ Adventsstund på Skollebakken kl.15:00-16:30
I år er det adventsstund på Skollebakken, der har vi ein flott gapahuk. Her blir det servert nissegraut, kakao og pepperkaker. I år som tidligare kjem nissen på besøk. Vi avsluttar med å gå i fakkeltog til julegrantenninga på rådhusplenen. Ta gjerne med ein fakkel.

🎄 Julegrantenning på rådhusplenen kl.17:00
– Musikklaget Ulf
– Musikkinnslag
– Appell
– Tenning av julestjerna på Osberget
– Tenning av julegrana
– Gang kring treet

1. desember – mandag

📮 Postkassa til nissen opnar utanfor Tijera

🎁 Vinn premie: Julekonsert frå Kulturkirken Jakob på Sjøborg

2. desember – tirsdag

🎨 Juleverkstad på Ulstein bibliotek kl.14:00-18:00
Vi pyntar pepperkakehjerter og pepperkakehus til pepperkakebyen. Verkstaden er i regi av UKM Ulstein, og alle er velkomne!

🌲 «Alle skal opp på Osberget» kl.15:00
Start ved gapahuken i Bugarden. Tilbake ved gapahuken i Bugardsmyra vert det ei lita sosial stund med medbrakt kaffi for dei som har lyst til det.
Turen går slakt oppover, den er ikkje lang og den er for alle – også rullestolbrukarar.
Takk til initiativtakar Gunfrid Brandal Dukefoss som inviterer til å gå denne turen til flotte Osberget saman kvar tirsdag – sjekk ut Facebooksida til turgruppa.

3. desember – onsdag

🎁 Vinn premie frå Bizarre – dobbel vinnarsjanse ved å registrere seg i butikken!

4. desember – torsdag

☕ Gründergløgg på Skaparhuset kl.16:30-18:30
Vi inviterer til Gründergløgg – ein sosial og inspirerande ettermiddag for deg som er gründer, sjølvstendig næringsdrivande, eller berre nysgjerrig på gründerlivet.
Møt andre skaparglade folk, få påfyll av inspirasjon og kos deg med gløgg (med og utan futt i), julekaker og gode samtalar på Skaparhuset.

🎪 Julemarknad med handlaga varer på Alti Blåhuset
I år finn du dei i 2.etasje i lokala ved Sunkost (gamle Aky- og Creativo-lokala).

5. desember – fredag

🧶 StrikkeTerje på Norli Amfi kl.17:30
Terje Tjelle presenterer den nye Vottestrikkeboka og viser inspirerande modellar.
Studio Lun kjem med Raumagarn, og Sunnmøre Strikkefestival deler nytt om festivalen i 2026.
Vottekonkurranse: Ta med eit par restegarnsvottar (nye eller brukte). Det mest kreative paret vinn vottar frå StrikkeTerje!
Gratislotteri: Vinn strikkebøker og kinobillettar til strikkekino i Fosnavåg!
Kjøp kaffi hos Braud og ta med inn. Begrensa med bordplass – men vi klarer å dele 🙂
Ta med ein ven, med eller utan strikketøy!

🎪 Julemarknad med handlaga varer på Alti Blåhuset
I år finn du dei i 2.etasje i lokala ved Sunkost (gamle Aky- og Creativo-lokala).

6. desember – laurdag

🎅 Nissen opnar pepperkakebyen på biblioteket kl.11:30
Velkomen til ein av dei kjekkaste dagane i adventstida på Ulstein bibliotek!
 Kl. 11:30 startar vi med lesestund medan vi ventar på nissen – ei koseleg stund for små og store som vil kome i julestemning.
 Kl. 12:00 kjem sjølvaste nissen for å opne pepperkakebyen 2025!
Etterpå får alle som vil helse på nissen og kanskje kome med eit ønske eller to.

🎹 Julejam på Creativo kl.13:00-15:00
Kom og nyt grooven når intimscena på Creativo skal innviast av eit knippe eminente musikarar.

🎪 Julemarknad med handlaga varer på Alti Blåhuset
I år finn du dei i 2.etasje i lokala ved Sunkost (gamle Aky- og Creativo-lokala).

7. desember – 2. søndag i advent

🎁 Vinn premie: Julekonsert med Ulstein storband på Sjøborg

8. desember – mandag

🎁 Vinn premie: Gåvekort på Ulsteinbadet

9. desember – tirsdag

🎁 Vinn premie frå Overvåg

🌲 «Alle skal opp på Osberget» kl.15:00
Start ved gapahuken i Bugarden. Tilbake ved gapahuken i Bugardsmyra vert det ei lita sosial stund med medbrakt kaffi for dei som har lyst til det.
Turen går slakt oppover, den er ikkje lang og den er for alle – også rullestolbrukarar.
Takk til initiativtakar Gunfrid Brandal Dukefoss som inviterer til å gå denne turen til flotte Osberget saman kvar tirsdag – sjekk ut Facebooksida til turgruppa.

10. desember – onsdag

🔥 Grill, spikk og leik i Blåhuspassasjen med Ulsteinspeidaren kl.18:00
Rundt våre leirbål er det plass til alle – det vert bålpanner, pinnebrøddeig, ein spikkestasjon for å lage grillspyd og livliner som ungane kan få prøve.

11. desember – torsdag

🏃 JuleTerskelTorsdag i Ulsteinhallen med Sport 1 Ulsteinvik og Hareidlandet Triatlon kl.20:00
TerskelTorsdag er eit kjekt og sprekt konsept som starta med at Sport 1 Ulsteinvik ønskte å trene saman med kundane sine. No er det etter kvart veldig mange som har oppdaga TerskelTorsdag, og kjenner på gleda ved å vere med på ei sosial og dermed ekstra motiverande intervalløkt kvar veke 
Økta skjer under trygg leiing av Daniel Slettebakk, og det er ingen konkurranse – her held du ditt eige tempo og kosar deg i den farta som dine bein og puls synst er utfordrande nok.
Vel møtt!

12. desember – fredag

🎁 Vinn premie frå Kitch’n – dobbel vinnarsjanse ved å registrere seg i butikken!

13. desember – laurdag

✨ Gratis julekino – Jul i Flåklypa – på Sjøborg kl.14:00 (FULLBOOKA)
Her er det berre å lene seg tilbake, nyte kinostemninga og kome i skikkeleg julestemning saman med Ludvig, Solan og Reodor Felgen. Etterpå samlast vi til Luciatog i Trivselsgata (sjå eige arrangement).
Kinoen er sponsa av Sparebanken Møre og Sjøborg 💛

👼 Luciatog gjennom Trivselsgata – oppmøte på rådhusplenen kl.16:00
Vi startar ved rådhuset med tenning av faklar (hugs å ta med) og musikk før toget går samla gjennom Trivselsgata. Undervegs blir vi møtt av song og tonar frå fleire lokale musikarar.
Ved gapahuken på Skollebakken ventar ei koseleg avslutning med gløgg, lussekattar og meir song.
Ta med familie, vener og naboar – små og store er velkomne til å delta i toget, eller berre kome for å nyte stemninga langs ruta.
Hugs å ta med faklar!

14. desember – søndag

🍽️ Gratis foredrag på Ulstein bibliotek med ernæringsfysiolog Kari Brandal kl. 11:15-12:00
Tema: Spis Smart – del av programmet for Møre Handballdraum

15. desember – mandag

💛 Hjertevarme: Denne dagen vil vi oppfordre alle til å støtte Hjertevarme-aksjonen – Vipps #848064
Les meir på Ulstein Frivilligsentral sin Facebook

16. desember – tirsdag

🎁 Vinn premie frå Pernilles Clinique

🌲 «Alle skal opp på Osberget» kl.15:00
Start ved gapahuken i Bugarden. Tilbake ved gapahuken i Bugardsmyra vert det ei lita sosial stund med medbrakt kaffi for dei som har lyst til det.
Turen går slakt oppover, den er ikkje lang og den er for alle – også rullestolbrukarar.
Takk til initiativtakar Gunfrid Brandal Dukefoss som inviterer til å gå denne turen til flotte Osberget saman kvar tirsdag – sjekk ut Facebooksida til turgruppa.

17. desember – onsdag

🎁 Vinn premie: Gåvekort på Ulsteinbadet

18. desember – torsdag

🎁 Vinn premie frå Bjørklund – dobbel vinnarsjanse ved å registrere seg i butikken!

19. desember – fredag

🌲 Julerebus langs nye turvegen til Osberget opnar

🎁 Vinn premie: Sponsa av Gjerde Rør

20. desember – laurdag

🌲 Julemagi i Trollskogen
Lesestund med varaordførar Lisa Mari og kulturelt innslag kl.17:00

21. desember – søndag

🎁 Vinn premie: Sponsa av Tussa

22. desember – mandag

🤸 Aktivitetsdag for familiar i hallen på Ulstein Arena kl. 11:00

🎬 Julefilm på biblioteket kl. 13:00

23. desember – tysdag

🎬 Julefilm på biblioteket kl. 13:00

🎁 Vinn premie: Goodie bag sponsa av Sparebank 1 SMN

24. desember – onsdag – julaftan

🎄💫 Open julefeiring på Kjeldsund leirstad og gjestegard
Kjeldsund, Ulstein sokn og Herøy sokn inviterer inn til julefeiring på Kjeldsund – meir informasjon her.

God jul!

Med atterhald om endringar.

Følg med på Ulstein Næringsforum si Facebook-side for informasjon om korleis du kan vinne premiar 🎁
Du finn også Facebook-arrangement for aktivitetane viss du søker på «LUKE» og nummer.

Vi vil rette ein stor og varm takk til Sjøborg, Ulstein Arena, Ulsteinbadet, Ulstein Frivilligsentral UNG, Ulstein bibliotek, Skaparhuset, Sparebanken Møre, Tijera, Norli Amfi, Overvåg, Kitch’n, Bjørklund, Tussa, Sparebank 1 SMN, Creativo, Mjøl & Meir, Tegneren, Ulsteinspeidaren, Pernilles Clinique, Bizarre, Sport 1 Ulsteinvik, Hareidlandet Triatlon, Gjerde Rør og Coop Mega for bidrag i form av spons, aktivitetar og premiar!

The post Julstein adventskalender 2025🎄 appeared first on Ulstein Næringsforum.

The post Sentrumsdugnad appeared first on Ulstein Næringsforum.

I 2024 søkte vi saman med Ulstein kommune om kr 800 000 frå Møre og Romsdal fylkeskommune til vidareutvikling av Trivselsgata, som vi var så heldige å få innvilga. Til no har vi i tillegg motteke kr 100 000 frå Kulturdepartementet si KORO-ordning til kunst i Trivselsgata, kr 300 000 frå Miljødirektoratet si Natursats-ordning samt kr 100 000 frå Sparebankstiftinga Søre Sunnmøre.

Vi har etablert ei prosjektgruppe beståande av vår sentrumskoordinator og prosjektleiar Rebekka Louise Knotten, planleggar Cecilie Roppen og kommuneoverlege Inger Lise Kaldhol frå Ulstein kommune, Beate Overvåg frå Overvåg, Ingrid Dybhavn frå Pernilles Clinique samt solid kompetanse med Siri Myklebust og Ingvild Yri frå Norconsult.

Målet med prosjektet er utvikle bygolvet i Ulsteinvik – altså å gjere plassen mellom bygga enda meir sosial, attraktiv og trygg for mjuke trafikantar <3

No ønsker vi DINE innspel, ønsker og meiningar – følg denne lenka for å kome til innspelsskjema!
Vi ønsker oss innspel frå folk i alle aldrar, og vi set stor pris på alle som tek seg tid til å bidra 😀

Du kan òg kontakte prosjektleiar direkte på rebekka@ulstein-nf.no/95 92 77 99.

The post Trivselsgata appeared first on Ulstein Næringsforum.

The post Spring Trainee appeared first on Ulstein Næringsforum.

Vi arrangerer kurs, foredrag og workshopar i samarbeid med det regionale næringslivet, kommunar og næringsforeiningar. Vi ønskjer å vektleggje BREEAM-sertifisering, sirkulærøkonomi og materialgjenbruk. Vi håper at tiltaket skal motivere næringslivet til å levere bygg, anlegg og eigedomsforvaltingstenester som er enda meir klimavenlege enn i dag. I framtida vil det truleg komme endringar i regelverk, kompetanse, anbodskriterier eller andre endringar som gjer at det vil oppstå større krav og vilje til å kjøpe berekraftige og klimavennlege tenester i desse bransjane.

Vi trur at dette vil styrke konkurransekrafta for desse næringane overfor offentlege kundar, samt gjere dei i stand til å delta i offentlege anbod. Vidare håper vi at den kunnskapen som vert kommunisert gjennom dette prosjektet skal kunne overførast til andre næringar. Om ønskeleg kan prosjektet utvidast til andre bransjar og prosjekt.

5. og 26. september 2024, altså første og siste torsdagen i september, er heile byggnæringa på Søre invitert til fagdagar på Skaparhuset. Dagane vil ha ulikt innhald, men begge vil ha klimatilpasning, gjenbruk, offentleg innkjøp og synergiar mellom offentleg og privat næring som sentrale tema. Les meir her!
GRATIS PÅMELDING

The post Berekraftig utvikling innan bygg, anlegg og eigedomsforvalting appeared first on Ulstein Næringsforum.

Søre Sunnmøre er ein arbeidsregion med mykje utflytting blant unge, og flyttestatistikken viser at svært mange aldri kjem tilbake. Regionen blir sett på som ein svært attraktiv stad å jobbe dersom ein ønskjer å arbeide innanfor den maritime sektoren, og mange har inntrykk av at det ikkje finst interessante jobbar i andre bransjar. Ein ser allereie eit kvinneunderskot, noko som truleg vert forsterka framover. Den maritime klynga er svært mannsdominert, noko som kan gjer det vanskeleg å tiltrekke seg unge kvinner. Ulstein kommune har ein høg del arbeidsplassar i privat sektor. Her er det mykje intern rekruttering, noko som gjer det utfordrande for tilflyttarar. Som ein ser er det lett å hamne i ein dårleg sirkel med negativ befolkningsvekst og kvinneunderskot.

Forprosjektet kan sjåast i tråd med NOU 2020:15 Det handler om Norge, som utgreier problemstillingar som omhandlar negativt folketal og ei aldrande befolkning. Distrikta er avhengige av auka rekruttering av unge arbeidstakarar. Det er dei unge som flyttar mest, noko som gjer dette til ei gunstig målgruppe å rette seg mot. Det er betrakteleg fleire unge vaksne som flyttar ut av distrikta enn inn. Motivet er som regel utdanning eller betre jobbtilbod. Å jobbe for å tiltrekke seg unge vil kunne bidra til befolkningsauke i seg sjølv, i tillegg til at desse ofte etablerer familiar og får barn. Å fokusere på denne målgruppa vil altså kunne auke folketalet og hjelpe å motvirke ei aldrande befolkning. Eit traineeprogram rettar seg nettopp mot unge vaksne og utgjer derfor eit godt tiltak for å møte desse utfordringane, og er med å skape eit berekraftig velferdssamfunn. Vidare viser utreiinga at flytting som regel skjer rett etter studiar. Eit traineeprogram sikter seg spesielt inn mot dei som nettopp har fullført studiane, og kan motivere studentane til å velje Søre Sunnmøre som ny heimstad. Traineeprogram trekkast også fram som eit verkemiddel med høg bufastheit. Det nemnast at tilbod om fast jobb og sosialt miljø er viktig for å lukkast med eit slikt program. Det viser seg også at traineear ofte blir lengre i stillinga enn andre i sin fyrste jobb.

Innhald i forprosjekt

Vi skal bruke dette forprosjektet til å kartlegge moglegheiter som finst i regionen. Etterkvart i forprosjektet ønskjer vi å få sett nokre rammer for korleis traineeprogrammet kan sjå ut. For å få til det er vi avhengige av å være i dialog med næringslivet på Søre Sunnmøre, for å få innsikt i kva det reelle behovet er. På den andre sida vil vi også kontakte potensielle traineer for å få eit betre innsyn i kva dei treng og ønsker. Vidare vil vi knytte kontakt med andre traineeprogram for å sanke inn erfaring og kunnskap. Mot slutten av prosjektet er målet å ha ein konkret plan for korleis eit traineeprogram kan gjennomførast på best mogleg måte her på Søre Sunnmøre. Vi har ambisjonar om å søke om stønad til eit fullskala prosjekt for å realisere traineeprogrammet. Frida Voldnes leiar forprosjektet, og er akkurat ferdig med sin master i innovasjon, entreprenørskap og samfunn.

The post Forprosjekt til traineeprogram appeared first on Ulstein Næringsforum.

Ulsteinvik har eit svært spennande og aktivt bysentrum beståande av to store kjøpesenter og fleire godt etablerte nisjebutikkar, der mange av dei har vore i drift i generasjonar. Ulsteinvik er i tillegg eit naturlig regionalt sentrum for området med sine mange servicetenester, eit svært aktivt næringsliv som trekk til seg mange forretningsreisande og eit sterkt organisasjonsliv som blant annet arrangerer fleire store sportsarrangement gjennom året.

Vi har eit godt sentrum, men utfordringar knytt til store områdar med parkeringsplassar midt i sentrum, manglande opne felles møteplassar, få stadar der born kan opphalde seg på deira premissar i sentrum og ein hovudveg som delar sentrum i to og skil butikkane frå sjøsida. Dette gir oss utfordringar knytt til det å skape eit attraktivt sentrum.

Mål for prosjektet

Målet til prosjektet er å få ein raud tråd i sentrumsutviklinga, gjennomsyra av berekraftig og sirkulær tankegong. Vi skal implementere nokre av råda frå parallelloppdraget:

• å skape 300-meters byen
• å skape eit bysentrum for alle
• å få det som bidreg til byliv til å leggast til byen
• å skape eit mangfald av møtestadar
• å legge til rette for sambruk i sentrum

Arbeidet skal i stor grad omhandle:

• berekraft og sirkulære modellar
• sentrumsutvikling
• born og unge
• kommunikasjon
• utvikle samarbeidsmodellen mellom UNF, kommune og næringsliv

The post Sentrumskoordinator i Ulstein appeared first on Ulstein Næringsforum.

Næringslivet og samfunnet i Ulstein kommune har siste tiåra hatt store konjunktursvingingar som har forandra korleis næringslivet er samansett. UNF ønskjer ein årleg «tilstandsrapport» på næringslivet samt å sette søkelyset på kva områder vi er sårbare på og ikkje minst kva områder som kan gi nye mulegheiter.

Samspelet mellom ein aktiv kommune, som sjølv er ein viktig næringsaktør og arbeidsgjevar, og eit næringsliv som stadig går gjennom omstillingar er viktig, og saman kan desse vere med å stake ut ein framtidig kurs for samfunnsutviklinga i Ulstein og i regionen rundt oss.

Delprosjektet «Ulsteinanalysen»

Denne skildringa er langt på veg ført i pennen av Møreforskning i samband med første fase av denne prosessen i slutten av 2019.
UNF ønskjer ei breidare anlagd analyse for heile kommuna, utover ei enkel telling av tal på verksemder og sysselsetting. Det kan tenkjast ulik grad av omfang på analysen som påverkar kompleksitet i gjennomføring og tilhøyrande tids- og ressursforbruk. Ei avklaring mellom UNF og oppdragsforskar om ambisjonsnivå og kor breidt analysa skal femne vil vere naudsynt før eit endeleg kostnadsbilete kan skisserast.

Mulegheitsområde for analysen

Ei muleg avgrensing for analysa kan vere å synleggjere kva økonomiske verdiar som skapast i kommuna og innanfor kva næringar verdiskapinga skjer. Avgrensinga tilseier at fokuset primært er å skildre tatus for næringsutvikling og grunnlag for verdiskaping i Ulstein kommue i lys av utviklinga dei siste åra (finanskrise => oljekrise => offshorekrise => omstilling => covid-19).

Det finns ulike indikatorar som kan leggast til grunn for å belyse kommuna si samfunnsmessige betydning. Verdiskaping er eit sentralt begrep då det, i motsetnad til omsetning, måler meirverdien som skapast etter fråtrekk for innsatsen av varer og tenester. I produksjonen. Meirverdien fordeler seg mellom ulike interessentar i form av løn til tilsette, avkasting til kapitaleigarar, renter til kreditorar og skattar og avgifter til styresmakter.

Det finns også alternative indikatorar som mål på samfunnsøkonomisk betydning. Til dømes lønsemd i verksemdene (som eit mål på avkastning til kapitaleigarar), produktivitet (verdiskaping per sysselsett), lønsnivå (som også omfattast i verdiskapingsomgrepet, men der kompetansenivå kan vere eit viktig element), eksportinntekter (men, vanskeleg å få tal på kommunenivå), og sysselsetting (fordi lav arbeidsløyse og høg yrkesdeltaking er eit mål i seg sjølv). Utover dette kan det vere aktuelt å inkludere andre indikatorar knytta til arbeidsmarknaden, som td. Pendling då Ulstein inngår i ein større arbeidsmarknadsregion, og indikatorar knytta til næringsutvikling som td. nyetableringar.

I tillegg til analyse av indikatorar knytta til sjølve storleiken på verdiskapinga, så kan det vere hensiktsmessig å belyse utviklingstrekk ved nokre demografiske tilhøve som gir grunnlag for den verdiskapande aktiviteten. Utviklingstrekk ved befolkningsstrukturen kan belyse korleis ein lukkast med å skape attraktive arbeidsplassar og bustadseigenskapar for rekruttering av arbeidskraft og kompetanse. Relevante indikatprar kan her vere alders- og kjønnsfordeling, utdanningsnivå, fødselsoverskot, flytting og innvandring.

Det vil også vere andre verdiar som er relevante i eit samfunnsøkonommisk perspektiv, utover dei som er gjeve ovanfor, og som bidreg til å skape ein attraktiv kommune, slik som kvaliteten på offentlege tenester, kulturttilbod, natur osb. Dette ligg pt. utanfor analyseoppdraget, men bør diskuterast internt i Ulstein kommune om ein ønskjer å innlemme det før bestillinga vert gjort.

I skildringa ovanfor har ein lagd til grunn ein analyse av relevante (men, ikkje nødvendigvis uttømande) indikatorar for skildring av status og utvikling relatert til næringsstruktur, arbeidsmarknad og befolkningsstruktur i Ulstein kommune. Så er spørsmålet om ei skildring av tilstandedn i Ulstein kommune isolert sett er tilfredsstillande ut frå ønska formål og ambisjonsnivå for analysen? Analysen kan også utvidast til å belyse utviklinga i UIstein med andre kommunar eller region (Søre Sunnmøre?) som referanse. Det kan også vere å vurdere strukturelle årsaker og drivarar bak utviklinga. Eller også, skildre konkurransesituasjonen i sentrale marknader som er viktige for verksemdene i Ulstein.

Datakjelder og nokre generelle utfordringar

Datakjeldene er mange, og det er uttrykt at dei opplevast som ufullstendige i høve å kunne gi eit korrekt bilete av næringslivet i kommunen. Eit påpeika dilemma er knytt til underavdelingar med lokal tilstadevering, som ikkje rapporterer under Ulstein kommune sine næringsoppgåver. Men, det kan også tenkjast at det finns føretak i Ulstein med underavdelingar lokalisert utanfor kommunen.

Eit viktig element vil derfor vere å kartlegge kva kjelder og indikatorar som er mest hensiktsmessige å bruke for å kunne seie noko objektivt om fenomen som ein ønskjer opplyst. Det vil innebere å velje robuste og tidskonsistente indikatorar frå pålitelege kjelder. Relevante kjelder er td. SSB (strukturstatistikk), NAV (arbeidsløyse), Brønnøysundsregisteret (økonomi) og KOSTRA (kommunal og fylkeskommunal verksemd).  Langt på veg vil ein søke etter data på kommunenivå, som allereie ligg lett og rimeleg tilgjengeleg. Men, det kan vere avgrensingar i nøyaktigheit og nivå på slike data, og at einskilde data må spesialbestillast frå kjelda mot ein kostnad.

I tillegg er er det særlege utfordringar knytta til innleige/utleige av arbeidskraft i måling av sysselsetting, og økonomiske storleikar hjå underavdelingar med lokal tilstadevering eller i verksemder som ikkje er rekneskapspliktige. Der sekundærdata ikkje gir tilstrekkeleg informasjon kan det vere aktuelt å supplere med ein begrensa Survey mot eit utval av bedrifter, men dette vil også innebere ein ekstra kostnad.

Budsjett/kostnadsanslag «Ulsteinanalysen»

Med bakgrunn i diskusjonen over, skisserer vi følgjande forslag og omtrentlege kostnadsanslag. Arbeidspakkane som skildrast representerer trinnvis aukande grad av ambisjonsnivå for analysen.

1. Grunnleggjande analyse

Dette vil vere ein deskriptiv analyse med fokus på å belyse utviklinga i verdiskapande aktivitet for næringslivet i Ulstein kommune basert på tilgjengelege sekundærdata. Analysen det første året vil også inkludere ei kartlegging av kva indikatorar og datakjelder som er mest hensiktsmessige å bruke for å gjennomføre ein robust og objektiv analyse. Vi anslår tidsbruken til ca 2,5 vekesverk. Vi tek atterhald om at eventuelle data som må spesialbestillast på kommunenivå kan medføre ein ekstra kostnad.

2. Survey blant lokale verksemder

Dersom det skulle vere naudsynt å skaffe data om tilhøve som ikkje føreligg i tilfredsstillande grad gjennom sekundærdata, kan det vere aktuelt å gjennomføre ein Survey blant lokale verksemder. Dette kan td. gjelde bruken av innleigd arbeidskraft, utsikter, kompetansebehov, eksport osb. Her anslår ein tidsbruken til ca 2 vekesverk for datainnsamling og bearbeiding.

3. Benchmark

Denne analysen inkluderer samanlikning/benchmark mot ein referanse. Referansen kan vere andre kommunar eller ein region, og ein må rekne med at det er noko meirarbeid i analysen sitt førsteår med å fastsette kva kommunar/regionar som skal utgjere referansegrunnlaget. Ei slik samanlikning baserast på sekundærdata for ei konsistent samanlikning. Anslått tidsbruk er 3-4 arbeidsdagar.

4. Analyse av strukturelle tilhøve

Analysen her er meint å utbrodere den grunnleggande analysen og samanstille denne med andre konjunkturanalysar og påvise trendar og drivarar som er relevante for næringslivet i Ulstein. Anslutt tidsbruk her er eitt vekesverk.

Gjennomføring

Sidan det naturleg nok er ei viss forseinking i tilgang på bearbeida (fjorårs-) data frå sekundærkjeldene, så vil gjennomføringa av analysen tidlegast kunne skje på tidleg haust. UNF ser føre seg at funna i analysen då kan presenterast til kommune og næringsliv under ei samling («Ulsteinkonferansen») på seinhausten/før jul.

Det vil verte teke ei runde saman med mulege leverandørar av analysen i forkant av bestillinga for å belyse rett kostnadsbilete og omfang av analysen.

Delprosjekt «Ulsteinkonferansen»

UNF meiner at «Ulsteinanalysen» kun kan fungere som første steg i ei meir profesjonell tilnæring av samfunns- og næringsutvikling i kommunen, og at det er kva ein bruker funna i analysen til som avgjer om ein lukkast med å forbetre utviklinga. Næringslivet kan ikkje, og bør ikkje, stå for denne prosessen åleine. Ein kommune sine oppgåver framgår av lovverket, men er for øvrig negativt definert. Det vil seie at kommunane kan ta på seg alle oppgåver som ikkje lovgjevinga eksplisitt har lagt til andre forvaltningsorgan.

Kommunen spelar ei stor rolle både som offentleg organ og tenesteytar. Men for å få balansen mellom skatteinngang og kostnader på tenester til å gå i hop, har ein kommune mindre mulegheiter til å påverke inntektsgrunnlaget sitt enn td. ei verksemd, og må arbeide i meir indirekte former. 

Eit slikt samarbeid med næringslivet i kommunen vil vere éin av desse formene, der kommunen aktivt kan delta i lokal samfunnsutvikling.

Presentasjon av analysen sine funn

UNF meiner at oppdragsforskaren (privat eller offentleg forskingsinstitutt/-byrå) legg fram funna i ein komplett og utfyllande rapport, samt presenterer ein lettfatteleg og oppsummerande samanfatning på ei felles samling mellom kommune og næringsliv.

Funna skal legge grunnlag for ein styrt prosess der næringsliv og kommune diskuterer funna, samt kva ein saman kan gjere for å finne rette vegane i utviklinga vidare.

UNF ønskjer å tilrettelegge for denne prosessen ved å arrangere «Ulsteinkonferansen» der presentasjonar frå analyse, næringsliv og kommune kan kummulere ned til diskusjonar og workshops for å ende opp med konkrete planar for vidare utvikling.

Viktige suksesskriteriar

For å lukkast med denne idéen, må følgjande element vere tilstades.

1. Kommune og næringsliv må forpliktast inn i prosessen

Ulstein kommune bør forplikte seg inn i prosessen over fleire år, der ein tek sikte på å bruke funna for å styre mot ei ønska utvikling. Ein årleg analyse vil kunne også seie noko om utviklinga går i rett retning.

Næringslivet gjennom dei store verksemdene, UNF, verkemiddelapparat og utviklingsselskap bør delta for både å kunne knyte eigne program og tiltak til prosessen samt sjølve vere med på å forme tilhøva til eiga verksemd.

Kan ein sjå føre seg ein «partnarskapsavtale for lokal utvikling» mellom næringsforeining, kommune, større verksemder og verkemiddelapparat?

2. Pilotprosjekt

UNF ønskjer at analysen og prosessen i etterkant vert brukt som pilotprosjekt for Møre og Romsdal eller Kommunal- og Moderniseringsdepartementet der ein ser på om denne form for sam-utvikling mellom næringsliv og kommune er ei god form og kva effektar den kan gi.

Vi vil derfor gjerne delta i eit samarbeid med desse der andre delar av det offentlege, forskingsmiljø og næringsliv kan koplast på for å kunne lære av prosessane her lokalt.

3. Workshop og diskusjon

Det er når analysen leggast fram, ein kan bruke den som grunnlag for diskusjon og deretter forme eit kart og ei retning vidare. UNF og Ulstein kommune må arrangere ein årleg treffstad for både presentasjon av analysen, diskusjonar rundt funna og ei ønska utvikling, samt konkrete prosessar/workshops for å sette mål og korleis ein vil nå dei saman.

4. Konklusjonar og tiltak

Dei konkrete målsettingane og tiltaka som ein kjem fram til, må leggast inn i strukturelt arbeid fram mot neste års samling. Tiltaka må vere målbare og leggast til ulike deltakarar etter hensiktsmessig plan.

Tiltaka kan også innarbeidast som ein del av det oppdragsforskinga måler effekten av i påfølgande år.

Budsjett

Dei konkrete kostnadene knytta til denne idéen heng mest saman med sjølve innkjøpet av analysearbeidet samt sjølve samlinga der ein tek tak i funna; altså Ulsteinanalysen og Ulsteinkonferansen. I tillegg kjem det ein del administrering av arbeidet frå oppdragsgjevar si side, koordinering av prosessen vidare mm.

Det er ikkje gjort vurderingar av muleg finansiering så langt i prosessen.

Gjennomføring

Arbeidet med å finansiere opp analysen og konferansen vil legge band på innsatsen no i første kvartal 2021. Vidare vil oppdraget skisserast opp saman med ulike tilbydarar innan oppdragsforsking og oppdraget sendast ut på «anbod».

I 2. kvartal vil rekruttering av næringsliv, verkemiddelapparat og andre interessentar og bidragsytarar ta til. 

Etter sommaren (3. kvartal) skal fokuset vere på å samordne seg med oppdragsforskaren slik at modellar, datakjelder og «skjelett» for analysen er klart til å fylle på med ferske tal for 2020. Samstundes legg ein opp ein prosess for korleis ta funna frå analysen vidare saman med kommune, utviklingsselskap og næringsforeining. 

Ulsteinkonferansen planleggast på bakgrunn av dette og verksemder/personar inviterast.

Ein må no også kvalitetssikre finansiering av Ulsteinanalysen 2022.

Konferansen gjennomførast i 4. kvartal og prosessen leier oss til konkrete tiltak og fordeling av oppgåver mellom kommune, næringsforeining og einskilde verksemder. 

Status

• Formannskapet i Ulstein kommune har 11. mai 2021 innvilga 200.000 kr frå næringsfondet til støtte av prosjektet.
• UNF har starta prosessen med å source samarbeidspartnarar for datainnhenting og planlegging av prosjektet.

The post Samfunns- og næringsutvikling i Ulstein appeared first on Ulstein Næringsforum.

Visit Ulstein har ein eigen aktivitetskalendar der alle kan gå inn og registrere ting som skjer i kommunen vår – her ønskjer vi stor variasjon! Husk å abonnere 😉

Visit Ulstein på Facebook
Visit Ulstein på Instagram

The post Visit Ulstein appeared first on Ulstein Næringsforum.

Idélaben vart heldt digitalt 25. november 2020 (oppdaterast).

The post Smarte Bygg – Smart Framtid appeared first on Ulstein Næringsforum.